Кога ќе ме прашаат каде е најубавата плажа која сум ја посетила досега, без долго размислување одговарам – плажите во Куба. Карибите ја имаат најубавата тиркизна боја на водата и долги, песочни плажи со бел песок и со сенки од палми, а како посебно убава плажа ја издвојувам плажата на островот Кајо Бланко (Cayo Blanco).
Cayo Blanco е мал, пуст остров, оддалечен на околу два часа возење со катамеран од пристаништето во Варадеро, Куба. Островот не е населен, но секојдневно има посетители кои доаѓаат на еднодневни тури, за барем на кратко да уживаат во овој земски рај.
![](https://patokolusvetot.mk/wp-content/uploads/2021/02/IMG_2025-e1613775341583.jpg)
На површина од 7км2 (15 км долг и 500 м широк) островот нема тврди градби, туку само неколку монтажни куќички – ресторан на отворено, неколку шанкови, тоалети и продавница за сувенири.
![](https://patokolusvetot.mk/wp-content/uploads/2021/02/Skype_Picture_2021_02_19T12_40_34_813Z-scaled-e1613775404470.jpeg)
Како да не ни беа доволни перфектните плажи во Варадеро, па решивме да го посетиме и Кајо Бланко, но најмногу заради тоа што по пат се застануваше да се плива со делфини и дефинитивно тоа беше една од најдобрите одлуки за посета на пуст остров. Cayo Blanco е остров од соништата, остров за хедонисти. Кога сонувате еден ден да се разбудите на пуст остров со рајска плажа – го сонувате Cayo Blanco. 🙂
![](https://patokolusvetot.mk/wp-content/uploads/2021/02/IMG_1103-e1613775993892.jpg)
Ако постои рај тогаш навистина треба да изгледа како Cayo Blanco – мал остров покриен со ситен, бел песок, опкружен со кристално чист океан во тиркизна боја и топла вода, со сенки од палми, коктели кои се служат во свеж ананас и највкусен јастог кој некогаш сте го пробале. Додека ја дегустиравме вкусната храна и уживавме во коктелите, во ресторанот на отворено слушавме кубанска музика во живо, а на плажата се танцуваше – сите посетители кои се нашле во моментот на островот, се групираат и некако успеваат сите да го фатат веселиот ритам и синхронизирано да танцуваат.
Cayo Blanco e весел, разигран остров. Вака изгледаше синхронизираното танцување:
Еден ден поминат на островов ми ги “наполни батериите” за целата наредна година. За фотографиите и видеата снимени на овој остров не беше потребен никаков филтер за дополнително разубавување, се е природно. Овде Мајката – Природа воопшто не се штедела кога го создавала.
![](https://patokolusvetot.mk/wp-content/uploads/2021/02/IMG_2029-e1613776095718.jpg)
Инаку, овој остров има интересна историја, во 1972 година симболично бил преименуван од страна на Фидел Кастро во Oстров на Eрнст Тилман (Ernst Thalmann Island) – германски кумунистички политичар и активист, а повод за тоа била посетата на водачот на Источна Германија – Ерих Хонекер (Erich Honecker) на Куба. Според амбасадата на Куба во Германија и германското Министерство за надворешни работи, преименувањето било „симболичен чин“: островот никогаш не бил оттуѓен од Куба и ниту една од германските држави не го поседувала островот, ниту пред, ниту по обединувањето.
![](https://patokolusvetot.mk/wp-content/uploads/2021/02/IMG_2024-e1613776793349.jpg)
И секако, додека уживате во тиркизното синило на Cayo Blanco – се дегустира автентичен кубански рум и се пуши кубанска пура.
Навистина, што уште е потребно за рај?!? 🙂
Автор на текст, фотографии и видео: А. Петровска
©patokolusvetot.mk Забрането преземање и копирање. Крадењето на авторски текстови е казниво со закон