На летовите на германската авиокомпанија “Луфтханза” отсега ќе може да уживаме во музиката на нашиот светски познат пијанист Симон Трпчески.
На страната на “Луфтханза” стои: “Македонскиот пијанист е прославен низ светот поради експресивниот начин на изведба и харизматичното сценско присуство. Ексклузивно за Луфтханза, Симон Трпчески избра неколку свои омилени музички дела.”
Трпчески има избрано 16 дела, во кои спаѓаат 5 фрагменти од неговиот проект “Македонисимо”, инспириран од македонскиот фолклор, кој го изведува со своите музички пријатели. Во неговиот омилен избор се влезени и дела од: Шопен, Чајковски, Бетовен и Равел – дел во негова изведба, дел во изведба на други светски уметници.
На својот Twitter профил Симон Трпчески напиша: “Чест ми е да споделам избор на музика со патниците на “Луфтханза” кои се вистински љубители на музиката.”
