Кањонот Матка е едно од најпрепорачуваните места за посета на секој турист, кој ќе дојде во нашата држава и не случајно британскиот “Гардијан” го има прогласено за еден од 10-те најубави кањони во Европа. Останатите 9 се: Викос во Грција, Сакликент во Турција, Гола су Горопу на Сардинија, Винтгар во Словенија, Кава Диспика во Сицилија, Горж ду Вердон во Франција, Партнах во Германија и Карес Горхе во Шпанија.
Матка – кањон на реката Треска, со површина од околу 5.000 хектари, е скриеното богатство на Македонија, кое се наоѓа на 15 километри југозападно од Скопје. До него може да стигнете пешки (ако сте расположени за подолго пешачење може да тргнете и од врвот на Водно и да стигнете до Матка), со велосипед, автомобил или со јавен градски превоз – автобус со број 60.
Во Матка има десет пештери со должина од 20 до 177 метри, од кои најпознати се пештерите: Врело, Кршена и Убава и една подводна пештера – Подврело. Пештерите се полни со сталагмити и сталактити и се интересни и едукативни за посета. Може да ги посетите со тура со чамец или да изнајмите кајак.
![](https://patokolusvetot.mk/wp-content/uploads/2020/03/vrelo5-e1584559050433.jpg)
Природата кај Матка била навистина дарежлива, па така овде може да сретнете 1000 видови на растенија, од кои 20% се ендемити, а внимание сигурно ќе ви одземат и голем број на пеперутки кои овде ги има – 119 видови дневни и 140 видови ноќни, од кои 77 видови се балкански ендемични пеперутки.
Може да поминете еден цел ден исполнет со различни активности: пешачење, прошетки, алпинизам, кајакарство, спелеологија, посета на средновековни манастири со живописни фрески, набљудување на птици (особено белоглави орли) и ретки видови пеперутки, како и да дегустирате вкусна храна во рестораните, уживајќи во погледот кој ви се пружа кон кањонот.
![](https://patokolusvetot.mk/wp-content/uploads/2020/03/vrelo1-e1584559398708.jpg)