Прва асоцијација за Кападокија е летање со шарен балон на топол воздух. Секако дека тоа е доживување кое не треба да се пропушти кога ќе ја посетите Кападокија. Споделуваме неколку совети од ова уникатно искуство:
- Сместете се во гратчето Гореме, во близина на ова место полетуваат балоните.
- Резервирајте си место во балон на време – бројот на лиценцирани балони кои летаат е ограничен на околу 100 во денот. Обично хотелите каде сте резервирале сместување во Кападокија се нудат тие да ви резервираат, при што ќе ви понудат неколку опции, поевтини и поскапи варијанти, ќе ви сугерираат која е најдобрата опција, ваше е да се одлучите за една од нив. Подобра варијанта е да уплатите преку хотелот уште пред да пристигнете во Кападокија, отколку да чекате на лице место да уплатите – нема да најдете поевтина варијанта, а и голема е веројатноста да нема место за денот кој сте го предвиделе за ова доживување. Имајте во предвид дека луѓе од цел свет ја посетуваат Кападокија, а дневно во балон може да летаат околу 2000 патници.
- Цената зависи од видот на балонот и од компанијата со која ќе летате, моментално се движи од 120 – 150 евра од човек. За подобро доживување и поголема комоција (иако корпите се мали и движењето е ограничено), подобро е да летате во балон чија корпа собира помал број на патници. Бројот на патници во еден балон се движи од 12 до 24.
- Облечете се во топла облека – полетувањето е рано наутро, околу 5 часот, пред разденување, за да се фати изгрејсонцето во балонот, кога сеуште е ладно, дури и во топлите месеци од годината.
- Пред да ја посетите Кападокија, проверете ги временските услови за денот кога планирате да летате со балон. Ако се неповолни временските услови, балоните не полетуваат. Ако имате уплатено летање, а сепак нема услови (врне дожд, снег, дува силен ветер или има магла) парите ќе ви бидат вратени. Најдобро време за посета на Кападокија е од Март до Ноември.
- Понесете си добар фотоапарат и селфи стап за телефонот со кој ќе фотографирате – за да фатите подобри агли за фотографирање, бидејќи корпите на балонот се прилично тесни и немате место за движење.
- Летањето со балон трае околу час – час и половина, во зависност од временските услови. Пред полетување, пилотот на балонот ќе ве обучи која положба да ја завземете пред полетување и пред слетување на балонот.
- Сигурноста на летањето со балон зависи од искуството на пилотот и компанијата, па затоа одлучете се за летање со компанија со искуство, која пред се’ се грижи за безбедноста на патниците.
- Откако ќе заврши летањето и ќе слета балонот, следува наздравување со пилотот и останатите патници со пенливо вино за успешен лет и доделување на сертификат за летање со балон. Наздравје!
Задоволството од ова уникатно доживување трае многу подолго од самиот лет , а погледот кој го имате од балонот не може да се долови со опишување и фотографии, треба да се доживее. И не заборавајте, летањето со балон на топол воздух е само една од атракциите во Кападокија, одвојте доволно време и за посета на Музејот на отворено небо, за подземните градови Деринкују и Кајмакли, за дворецот во Учхисар и секако за дегустација на превкусна храна и релаксирање со турско кафе.
Автор: А. Петровска
©patokolusvetot.mk Забрането преземање и копирање. Крадењето на авторски текстови е казниво со закон
