Photo: A.Petrovska www.patokolusvetot.mk

Посетата на старата чаршија во Скопје е секогаш добра идеја, а особено во овој период од годината, кога времето е идеално за прошетки – ни премногу ладно, ни премногу топло.

Photo: A.Petrovska www.patokolusvetot.mk

Одличeн период за да поминете барем неколку часа во уживање на сите места, вкусови и мириси кои ги нуди чаршијата, шетајќи по тесните улички преполни со мали дуќанчиња и интересни локали за вкусна храна и кафе.

Photo: A.Petrovska www.patokolusvetot.mk

Прошетајте по оваа турска чаршија, чие постење датира од XII век и каде како ретко во кој друг дел од градот, тука се’ уште се чува стариот дух на Скопје, со многу мали занаетчиски работилници и дуќани, бурекџилници, чајџилници, ќебапчилници… а, новиот дух на модерното време се отсликува во нови, интересни барови.

Photo: A.Petrovska www.patokolusvetot.mk

Па така, овде пробајте турско кафе сварено на песок или несекојдневно кафе во кокосов орев, свежо цеден сок во ананас, турски локум со безброј вкусови и бои, тазе баклава, орасници и падобранци кои се топат во уста, сочно трилече, топли кикиритки…

Photo: A.Petrovska www.patokolusvetot.mk

Секако, не одете си од чаршијата без да изедете 10-ка со кромид, со топла лепиња и лута пиперка, во било која од ќебапчилниците, зошто овде ќебапите се секогаш тазе, а услугата е брза и љубезна.

Photo: A.Petrovska www.patokolusvetot.mk

Ќе забележите дека многу голем дел од посетителите во чаршијата се странци – сами или во групна посета со водич кој им ја раскажува историјата на градот и чаршијата – која во 2008 година е прогласена за културно наследство од особено значење и оттогаш е под трајна заштита на државата.

Photo: A.Petrovska www.patokolusvetot.mk

Уживајте во прошетка по калдрмата на старава скопска чаршија, ќе откриете барем неколку нови места кои досега ги немате забележано.

Автор на текст и фотографии: А. Петровска

©patokolusvetot.mk  Забрането преземање и копирање. Крадењето на авторски текстови е казниво со закон